ردية بين مهدي بن حويل وخاله الشاعر المعروف حسين بن جارالله المحامض اليامي
بعد ممازحة ودعابه من خاله ان قصيده فالغزل قام بعدها بعشر دقايق وكتب له الابيات ذي وطلع ورد عليه ابن جارالله
يقول الشاعر مهدي بن حويل
أنا من الدنيا مهاجر ومعتاض
يالله بحسن الخاتمة والتدابير
والشعر هيض وغيض ورياض وفياض
فيه المعاني والحكم والتعابير
الشعر قوة حبك وإلهام وألفاظ
ألاعبه واصخر القاف تصخير
وانا قصايد هاجسي كل الاغراض
ما وقفت علئ الهوئ والغنادير
في كل ساحة لي مساحة ومركاض
والحرف يشهد والأدب والجماهير
ياخال واسمك بارق فالسماء ناض
وعلئ يدك درست شرح المعايير
ما أظن تلميذك طايحً تحت الانقاض
الا لو انك شايفً حاجةً غير
وجاء الرد
من الخال الوالد الشاعر حسين بن جارالله المحمضي اليامي
يالله يالي للمخاليق حفاظ
حفظك من الي يكتبون التقارير
وجسمي تحفظه من صعيبات الامراض
والنفس قدرها على ان تفعل الخير
جعلت طير(ن) طاير(ن)مابعد ناض
عاده صغير(ن) تحت حكم المقادير
وسويت قاف(ن) صعب عمداً ومغتاض
لاتحسبنك ياصبي سالمً الزير
الله يعوضنا لما فيه نعتاض
والله يسهل لي جميع المشاوير
بعض الحجج ياهيه يبغي لها قاض
يقضي بفعل الخير ولا له يشير
الي بقلبي باقي ً مابعد فاض
والسر خله يافتى قاعة البير
