الرئيسية / زوايا / سيد المزايين

سيد المزايين

سيد المزايين

الشاعر /عبدالعزيز الأزوري

يا حظ من عذب اللِّمى . . صار خِلِّه
المرهف . . الحساس . . سِيــد المزايين

العنـق . . يزهابـه . . كما عنـق دلـّـه
والرمش من فوق النواعس . . جناحين

والثغـر . . عِقد الماس في حُضْن فُـلّـه
والخشْم . . كنِّـه بَـرزخٍ بين بحرين

ما ينطق الكلمة . . على غير حِلّـه
لأجل العسل . . ما ينسكب فالميادين

صمته مثل . . هيبـة دُول مستقله
وليا نطـق . . ما يشبع ( الراء ) بلحين

واللي بعدهـا . . زوَّد الطين . . بلّه
يوم ان سمعْته .. يدمج الـتاء / بالسين

عُمره صغير . . اربع عشر ما وصلِّه
و ليـا حكى . . زوِّد عليها . . ثلاثين

وليا جـلـس . . ما يندرى عن محله
وليا وقف . . مثل النخل في البساتين

عطـره دوا . . للروح من كلّ . . عِلّه
نسمة مطر عدّت على قطف ياسْمين

زايد حــلا . . ما يشرب الـتُّـوت كله
يزهـر به الرمان . . يسكر بهِ التين

فيه الحنان . . احسن صفات و جِبلّه
لو قسمِّـه . . جـمّـع شتـات المحبين

الله و اعلم . . لو ظهر دقِّه . . وِ جِلِّه
شطرين صدره . . نابتـه فـوق قلبين

ما كلِّ وقته . . في الوناسه . . يِفِـلَّه
متوازنٍ . . ما بيـن دنياه . . و الدين

مديت كفي . . في الشَّعَر يوم فلِّـه
و قمت اغني . . ليل ياليل . . ياعين

واثـره تمهّـلني . . على حين . . طلّه
وانا احسبني . . قـد تمكنت به زين

روعنـي السيف الحدَب يــوم . . سلِّه
يوم انزوى بي . . بين الأهداب والعين

في عيـنـه اليمنى . . قِضـاةٍ و مِلّـة
والعين الاخرى . . شفت ناسٍ مـدانين

عز الله ان . . دلّ العزيزين . . دلِّه
ما يفضح اسرار الكرام . . العزيزين

قلت العفـو !! قلي : توكل على الله
العفو ما يشمل كبير المحبين

 

عن الكاتبة / ريماس التميمي

شاهد أيضاً

ابتكاريا وإصدار ( همهمات امراة )

ابتكاريا وإصدار ( همهمات امراة ) الحدث : ناصر بن حويل يتوارد النبض الوارف تحت …

اترك تعليق -البريد ليس مطلوب - اختياري